小宇宙從現

小休一天, 探過婆婆, 洗淨一大籃衫, 拜會完大夫, 飲埋苦茶, 明天又繼續努力!

呢兩日婆婆既精神明顯地好轉, 仲開始發揮佢既小宇宙添!
今日醫生已經將婆婆身上既所有既喉管拆除喇! 行動頓時自如返晒~ 住o係婆婆隔離床位既福建婆婆, 今朝因為身體不適不時嘔吐, 面都青埋! 婆婆見到福建婆婆去完洗手間出o黎, 立即擒起身大叫: 「喂! 你因住暈呀! 叫姑娘幫你o丫嘛~」差o的就'鏢'落床自己去扶人o地!! -_-"

每日去探望婆婆既時候, 都只係想俾佢多一點既鼓勵, 希望佢會康復得快o的...無諗過婆婆堅毅不屈既性格, 反而成為我最大既鼓勵! 佢亦開始懂得注意自己既飲食, 無再唔聽話亂食野...
我諗: 懂得愛惜自己、唔令愛自己既人擔心, 係對佢地最好既回應。