後記

今次係我第二次去台灣呢個地方﹐第一次係三年前跟媽咪公司既大旅行去既。由於今次係自遊行﹐自己計劃所有行程時間﹐不用趕鴨仔﹐真係自由好多架!! 再加上今次有朋友同行﹐當然玩得更高興啦~

我地到達台灣既時間已經係星期六下晝兩點幾﹐回到酒店放低行李差不多四點﹐時間唔多﹐就去ta介紹既敦化站附近逛逛。三個唔識路既女子﹐出閘後完全唔知行邊個方向﹐誤打誤撞竟然又去到ta所講既日式細舖小街。其實只係由大街行入幾條巷﹐但係就同大街外面既感覺好唔同。我自己就好鍾意呢個地方﹐唔似繁榮既遊客區﹐呢度人流不多﹐感覺似去到一個小村莊。

星期日一早﹐我地去到台北靈糧堂參加崇拜﹐呢個雖然唔係景點﹐但就係我今次最想去既地方。阿沈常常都提起﹐台北靈糧堂既小朋友都好精靈﹐人數雖然多﹐但係就好自律。準備入教會前既一段路﹐見到一組組既小朋友﹐就o係室外寒冷既走廊分組﹐彷彿佢地已經習慣時時有人o係身邊走過﹐就算我地行o係佢地身邊影相﹐都仍然目不斜視。等候崇拜開始之前﹐還有小朋友呼籲我地幫襯買小禮物支持佢地﹐又乖又勇敢﹐唔知我地教會既小朋友幾時可以咁呢﹖呢度既敬拜都好感動﹐只係敬拜都用了近一個鐘﹐大家就企足一個鐘~ 呢次亦係第一次﹐連會聚唱國語詩歌發音都咁標準!^^
因為天氣唔好﹐灰色既天令我地o係淡水睇唔到日落﹐不過多左一個多小時@天仁茗茶chit chat既機會都不錯呀~

第三日太疲倦﹐三個都訓到十一點幾﹐才準備展開我地既手信日 - 金瓜石+九份。呢日我地遇上好心既年輕巴士司機﹐佢話我地知金瓜石無咩睇﹐黃金博物館星期一又休息﹐就車我地上去金瓜石﹐等我地o係果度影幾張相﹐然後原車兜返我地落去九份(無再收我地車費添呀!) 。如果唔係我地就要係冷冷既山頂呆等喇~ 呢日好凍架!!佢仲話香港人見好多﹐未見過三個都咁靚! 多謝呢位好心地既司機~ You made our day la~

最後一日出太陽喇!! 太陽終於出黎歡送我地離開﹐雖然有點遲﹐不過總算俾我知道台北係有陽光既~ 天陰天睛都一樣要過﹐無理由因為天陰影響我地旅行既心情架嘛!
繁榮既香港我地返來囉!